Esta competencia traballa as habilidades para buscar, obter, procesar e comunicar información, transformándoa en coñecemento, e implica ser unha persoa autónoma, eficaz, responsábel, crítica e reflexiva ao seleccionar, tratar e empregar a información e as súas fontes, as distintas ferramentas tecnolóxicas e os distintos soportes.
1. Dimensión social
● Desenvolvemento de prácticas responsábeis e críticas no uso da tecnoloxía e no tratamento e difusión dos materiais dixitais e da información na rede.
● Valoración crítica do papel que xogan as TIC no desenvolvemento da sociedade, economía e cultura.
2. Alfabetización tecnolóxica
● Coñecemento da terminoloxía básica, as aplicacións principais, os procesos máis comúns e os usos creativos da web 2.0 ou social.
● Interese por actualizar os coñecementos e as prácticas en relación coas TIC, con achegamento comprensivo a novos e máis elaborados xéneros discursivos (anotación ou post, podcast, etc.).
● Desenvolvemento de estratexias e autonomía para identificar e resolver problemas no uso produtivo de programas e aplicacións web: blogues, editores de diapositivas, presentacións multimedia…
3. Traballo coa información
3.1. Procura de información, selección e recolleita
● Acceso á información utilizando técnicas e estratexias específicas. Avaliación e selección de novas fontes de información segundo fiabilidade e utilidade para afrontar tarefas con éxito.
● Busca, selección e rexistro da información a partir de guías.
● Lectura e aplicación adecuada en distintas situacións próximas ao alumnado e en contextos sociais e laborais de linguaxes específicas básicas: textual, icónica, visual, gráfica e sonora.
3.2. Transformación da información en coñecemento
● Comprensión e integración da información nos esquemas previos de coñecemento, con emprego de mapas conceptuais, gráficos, etc. en soporte dixital.
● Tratamento da información: organización, síntese, relación, procesamento… Análise da información a partir de guías.
● Revisión dos borradores das anotacións das bitácoras dixitais e doutras producións.
3.3. Comunicación da información
● Uso das tecnoloxías da información e a comunicación como elemento esencial para aprender e para comunicarse.
● Emprego dos diferentes recursos propios dos xéneros dixitais e expresivos na creación de hipertextos, material multimedia, etc.
● Elaboración de producións adecuadas ás características e posibilidades das ferramentas web, responsábeis e creativas.
4. Intercambio comunicativo na rede
● Uso responsábel e adecuado dos medios de intercambio: foro, chat, redes sociais…
● Traballo efectivo en contornos virtuais colaborativos.